【保寶達人】認識內地「保險+高端康養」業務 入場費最少投保2,000萬?

2021年「十四五」規劃綱領將「積極應對人口老齡化」提升為國家戰略,產業上下游各類型企業廣泛參與、加速探索促進更加均衡嘅養老支柱體系建設,內地嘅保險企業當然都唔例外啦。

 

根據中國房地產大數據應用服務平台克而瑞預測,2022年底中國養老產業市場規模可達9.1萬億元,到2031年可達22萬億元,發展潛力認真巨大,難怪各間保險企業都積極進軍呢個市場。

 

保寶達人早排有幸跟團北上到大灣區考察,行程包括參觀位於深圳市中心最高建築物嘅某間國內知名保險公司展廳,成層樓主要展示佢哋精心打造嘅「康養業務生態圈」,又安排高管為團員講解「保險+高端康養」、「保險+居家養老」同「保險+健康管理」一體化養老解決方案,真係令人大開眼界。

 

佢哋嘅保險喺高端康養方面,將優先聚焦一線城市同部分核心二線城市核心區,建設位於市中心嘅綜合康養社區,第一批經已全速建設中,睇示範單位同建築模型,居住環境同豪宅有得揮,而且仲有最先進嘅無障礙設備同照顧服務,絕對係非常體面同享受咁養老。

 

當然,可以用到呢種鑽石級康養服務嘅人,都非富則貴,因為最頂級嘅「保險+高端康養」入場費,就最少要投保一張2,000萬嘅保單,當投保人或者佢嘅上一代親屬,排到入住到的話,每月仲要畀幾萬蚊使費。

 

同樣面對人口老化,但係呢種保險結合高端康養嘅業務模式,係香港保險市場好難做得到,一來香港市場細,二來缺乏土地,保險公司喺市中心買幅地,再起一幢高端養老中心,根本係無可能,所以呢次考察對於我哋,真係開吓眼界就足夠了。

 

保寶達人 – 為您八盡保險天下事

更多保寶達人手記Click Here

 

任何於本文章的評論或意見純屬來自個別嘉賓/隊長等,並未代表保協之立場。