【保寶達人】「臨時便利措施」走入歷史 3年來對業界究竟便唔便利？

保監局4月頭發通函通知所有獲授權人壽保險公司，表示「臨時便利措施」將於2023年4月30日後取消。臨時便利措施喺2020年初推出，主要因為疫情期間不便親身銷售，容許以非面對面方式分銷特定保障型保險產品。

為咗給予保險公司足夠時間調整內部程序同處理2023年4月30日或之前遞交嘅投保申請，保險公司將有1個月過渡期，即係正式取消日期係5月底。

其實復常就快半年，Agent見客都回復正常，甚至忙到見唔切，所以臨時便利措施應該幾乎無人仲用緊，取消都係意料中事。因為對於Agent銷售產品嚟講，面對面始終係最有效同直接嘅方式。

其實呢項措施一直延長，前後持續咗成3年，但其實對Agent係咪真係有幫助呢？有大隊長就話，疫情比較嚴重嗰幾段日子，措施梗係有人用，但普遍比例都係比較低，而且多數係用來銷售醫療保障呢類比較簡單嘅產品。

另外有大隊長就話，就算係疫情嚴重嗰陣，措施幫助都唔係好大，好似佢成個團隊遙距簽嘅單可以話係寥寥可數，因為關鍵係實際操作流程比較複雜，不如揸架車去個客樓下好過，對方見咁有誠意，一般都好願意落嚟傾甚至簽單。

因為受疫情影響，有啲公司容許客戶斷供單喺90日內簡易復效，呢項行業「自發性」便利措施反而常用過「臨時便利措施」好多，當時有啲客因為周轉遇到困難，或者身在內地，又或者唔識網上過數又唔敢出街去銀行，導致保費過期未交，咁如果90日內交返錢，只要註明因疫情遲交，就當你照常交保費，應該係沒有任何影響。以前要咁做，多數要提供證明，有啲保單條款嘅時效又要重新計過，張單實際上都係斷供咗。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。