【保寶達人】打穿主力牆誰之過？裝修保險會否賠償？

有時網民真係偵探上身，除非肯定自己一定無問題，真係唔好隨便將自己啲嘢放上網，特別係炫耀。好似最近日出康城有個單位開心Share新裝修，點知畀人發現佢涉嫌拆除主力牆，令到屋宇署要介入調查。

要確定係咪主力牆要詢問專業人士意見，但係就咁睇圖則，嗰幅好明顯係厚身牆，決定拆之前都唔會懷疑一下？

主力牆亦即係結構牆，材料主要係石屎、英泥，中間鋪有鋼筋，用來支撐成棟樓嘅結構，即係好似骨頭咁撐起我哋身體咁樣。就算唔係主力牆，只係拆除普通間隔牆，都先要諮詢專業人士或註冊承建商，開工時亦要通知管理處，不過事實上總有人覺得拆牆好少事，唔使通報咁麻煩。

就算唔知係咪主力牆，到真係拆嗰陣，都會發現有鋼筋喺入便，唔通仲繼續鋸斷條鋼筋佢？如果真係主力牆都照做工程，設計公司同裝修師傅嘅專業水平真係好有問題。不過依家盛傳單位業主係一名地理代理，咁仲衰，做得地產應該更清楚主力牆係唔郁得，後果可以好嚴重。如果都堅持咁做，其實可能根本就係諗住暪天過海（的確如果唔係裝修公司Upload條片，好大可能唔會有人發現）。

而家業主需要承擔額外一筆還原工程費，可能有人問買咗裝修保險有冇得賠？市面上裝修保險有一種叫「工程裝修保險」，主要保障業主喺裝修期間，因意外而造成嘅財物損失，通常喺裝修前投保，根據裝修報價單設定一個比例嘅保障金額。

就算業主真係乜都唔知，由於無向專業人士諮詢過，又無通知管理處，打穿主力牆屬於違規，不屬於意外，就算買咗裝修保險都無得賠，呢筆錢業主只能「硬食」。暫時裝修公司只係刪除咗條片，無做任何回應，如果業主打算向有關人士追討損失，都只能循民事途徑。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。