【保寶達人】又到MDRT放榜 2023年排名有冇變化？

又到咗一年一度放榜嘅時候，講緊唔係DSE，係MDRT。2023年MDRT榜單早前公布，唔算有好大驚喜，香港市場嘅「三大」公司繼續領風騷，排名亦冇變。

「紅A」再度冧莊全港最多MDRT嘅公司，有2,443人，同上年2,458人差唔多；第2名係「綠M」，有1,393人，不過對比上年成2,028人就跌咗唔少；至於第3名「P記」有743人，上年就有850人。留意2023年MDRT，其實計算緊行家喺2022年嘅業績，當時仲受緊疫情影響──上半年遭遇第五波疫情，加上全年封關，仲可以有幾唔錯嘅成績，所以話香港保險業真係韌力十足。

如果睇全球，中國內地嘅MDRT人數再度冧莊「世一」，仲由上年15,783人，升到今年嘅17,182人。其實唔同國家同地區嘅MDRT要求都唔同，2023年中國內地佣金要求（FYC）係198,500人民幣，只係香港要求嘅一半多少少。

如果行家好記性，相信仲記得疫情之前，內地訪客生意火紅，MDRT榜單曾經爭崩頭，龍頭保險公司經常爭位，叮噹馬頭，宣傳招數亦層出不窮，好似你話自己全港第一，我就叫港澳第一，嗰陣可以話係百花齊放嘅時代。而家中港兩地終於重新恢復通關，聽聞有唔少行家頭一、兩個月就完成MDRT，睇嚟出年2024年嘅MDRT榜會有好戲睇！

最後提提大家，2024年MDRT香港區嘅最新業績要求，比上一年度加咗兩萬幾，FYC要成444,400港元先至達標，不過通關後行業勢頭向好，唔少行家都有信心可以達標。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。