【保寶達人】內地訪客生意後勁不繼！下半年仲有冇運行？

保險業第一季取得開門紅，特別係內地訪客生意，保監局嘅統計數據顯示達到96.13億港元，較一年前勁升2,686.4%；新造保單數目34,506份，一樣勁升3,253.4%，形勢睇落一片大好，不過踏入第二季，情況就好似不似預期喇……

呢一刻第二季數據仲未公布，但係一眾大隊長一講起就擰晒頭，有人甚至話第一季只係「虛火」。好明顯，第一季係食正「通關紅利」，因為三年疫情儲落嘅需求，通關後一次過爆發出來。

有熟悉內地嘅大隊長就補充，最近內地銀行對於提款管制又嚴咗，攞錢一啲都唔容易，拎十萬都要問長問短又要證明，何況要搬一大舊錢嚟香港買保險。所以可以調到資金嘅有錢人，啲錢喺第一季已經走咗。

仲一個主要原因，就係自由行其實未正式恢復。只要落一轉廣東道都睇到，雖然未至於疫情期間咁水盡鵝飛，但排隊入名店嘅旅客，最多嗰陣都只係得十個左右。其實而家好多省級城市居民都拎唔到簽證，第一季落到嚟嗰班，多數係因為商業上嘅便利，反映係第一季生意上，見到大部分都係大額儲蓄單，反而疫情前賣好多嘅傳統保障單，好似危疾、醫療嗰啲唔係好見到。

踏入下半年，相信行業會繼續受到內外夾擊，仲有排捱。中國經濟差大家都知，經濟無增長，啲人唔敢投資，影響內地訪客生意，之但係連過去幾年支撐行業嘅香港本土生意，踏入今年都唔係好得，其實睇返第一季數據，已經見到根本係無增長，甚至微跌。

自由行效應預計第二季踏入第三季左右，會開始有序回復正常，希望下半年會有轉機啦！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。