【保寶達人】慎防「港車北上」保險「甩轆」攻略（上）

「港車北上」計劃唔經唔覺行咗近兩個月，唔少有需要北上嘅行家都試過申請，甚至已經成功揸車北上。雖然而家都仲係需要抽籤，但有大隊長話申請咗兩次就成功，仲話整個流程都好順利添。

而家「港車北上」車輛必須符合香港同內地有關汽車第三者風險嘅法定車輛保險規定。除咗自行投保內地嘅「機動車交通事故責任強制保險」（交強險）。為咗方便申請人，香港政府推出咗跨境汽車保險「等效先認」政策，申請人可透過提供相關服務嘅香港保險公司，購買符合規定嘅「等效先認」保單，

有大隊長就提醒，申請人要留意「等效先認」保單生效嘅日期，因為聽到有唔少人投保「等效先認」保單時，將起保日期填咗「港車北上」嘅出發日期。而內地有關部門審批「港車北上」申請嘅保單時，只會處理已生效保單嘅申請，所以喺出發當日先生效嘅保單，當然係通過唔到內地嘅審批，搞到要重新申請過。

所以要避免申請「甩轆」，保單生效日期要計足！舉個例子，如果申請人想喺9月1日出發，咁8月中左右就要遞交「港車北上」申請，到時要記得投保「等效先認」保險嗰陣，起保日期一定揀要早過或者等同於申請當天。

如果打算唔止一次申請「港車北上」，其實可以考慮投保一年期嘅內地「交強險」或者「等效先認」保單，咁就唔怕過期或者計錯日子啦！

下次再講講內地嘅「交強險」同喺香港買嘅「等效先認」保單有乜唔同，兩者保額點解可以相差成幾百倍。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。