【保寶達人】就嚟打風先買家居保得唔得？

早排打10號風又大水浸，呢啲時候通常會突然多咗人買家居保。早排天文台一早預告咗蘇拉打到嚟，全港都嚴陣以待，好多人臨時諗起買份家居保傍身，因為一般人住嘅單位唔會好大，保費一般都只係幾百蚊，講真換隻窗都唔止啦！

其實咁樣做係透過保險轉嫁打風造成嘅風險，聽落的確好精明，不過保險公司點會諗唔到吖。「你有張良計，我有過牆梯」，同其他保險一樣，家居保都係有不保條款，當中就包括「已存在情況」同「已發生情況」，即係當天文台已預告咗會有颱風之後先買家居保，到之後真係索償打風造成嘅損失嗰陣，保險公司通常會根據上述條款拒賠。

如果個風就打到嚟先買家居保，其實係「臨渴掘井」至真。所以一句講晒「未雨綢繆」，買家居保防打風同水浸，係用來防範唔知幾時出現嘅風險，所以喺每年颱風季之前就買定，先至係防患未然。

仲有，到咗實際投保階段，都要留意市面上嘅家居全險，唔係份份都包因天災造成嘅損毁，如果係因為打風同豪雨呢類天災導致漏水、水浸，可能根本唔受保都唔定，記得投保嗰陣要先做比較，確定個計劃有相關保障先好買呀！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。