【保寶達人】慎防「港車北上」保險「甩轆」攻略（下） 第三者保險保額要計足

上次提到申請「港車北上」嘅車保生效日期要揀啱，但係你又知唔知，就算跟足要求投保內地「交強險」，都唔一定可以安枕無憂。因為唔講唔知，內地車保嘅保額同受保對象，同香港係有好大分別，以下就為大家解畫。

究竟中港車保有乜唔同？首先係「保額」，內地「交強險」法定最低保額，以每宗事故計只有20萬元人民幣，當中又拆分成18萬元保障第三方死亡及身體傷害、1.8萬元保障第三方醫療費用，同埋2,000元保障第三方嘅財產損壞，就咁睇都知唔夠啦！

睇返香港嘅汽車第三者責任保險，法定最低保額為1億港元，兩者相差成500倍！所以只係買夠內地法定要求的話，冇事由自可，一旦出咗意外，超出賠償額以外嘅費用，就要由車主自行承擔。如果意外涉及傷亡，賠償好有可能高達百萬元以上。如果一開始投保較高保額，到時就唔使咁愁。

除咗保額，中港車保嘅「第三者」受保範圍同保險責任都有分別。買香港嘅車保，大家都知司機同乘客已經包括喺「第三者」範圍之內，但係原來內地「交強險」指嘅「第三者」，係唔包括車上人員同被保險人，即刻如果想保埋司機同乘客，就要購買額外嘅「車上人員商業保險」先得。

而家有咗「港車北上」，可以直接揸車北上消費真係好舒服，但車主記得要按個人風險接受程度，選擇適當保額嘅車保。其實而家有提供「等效先認」保單嘅保險公司，普遍都有提供高過內地「交強險」最低保障要求嘅商業險選項，保額由100萬至1,000萬人民幣都有，「港車北上」車主不妨考慮附加投保。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。