【保寶達人】邊有咁大張保單隨街跳？提防跨境勒索新騙局！

騙案層出不窮，通常目標係普羅大眾，但估唔到而家出現專門針對保險中介人嘅敲詐勒索騙局，各位行家切記提防提防……

話說有行家收到來自內地唔認識微信用家查詢，聲稱其親戚打算購買大額投資理財產品，金額有成千萬人民幣以上，問有冇合適產品可以推介，當開始傾傾吓，對方會表示好有興趣，提議行家親自上深圳見面傾投保詳情。

好多行家一聽就知，邊個咁大張保單隨街跳吖？如果行家真係走上去傾保單，對方就會偷偷地錄影或者錄音，之後就以呢啲證據勒索金錢，唔肯就範就威脅將證據交畀香港監管機構，控告喺香港境外跨境銷售香港嘅保險理財產品，搞到你釘牌咁話！

由於勒索屬於嚴重罪行，保寶達人呼籲行家一定要提高警覺，如果收到不知名微信要識得分辨真偽，就好似曾經流行一時嘅投資、賭博「殺豬盤」咁，即刻封鎖對方，如果認為有可疑，亦可以主動報畀香港警務處嘅反詐騙協調中心。

記住，跨境消費就好喇，唔好跨境銷售呀！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。