【保寶達人】極端天氣下受傷或死亡 人壽/醫療/意外保有冇得賠？

相信大家對早前百年一遇嘅黑雨事件仲記憶猶新，但係大家又知唔知，一場持續多個小時嘅暴雨，保險賠償額竟然比2018年造成嚴重破壞嘅超級颱風山竹更高，保監局估計超過30億港元！大部分都集中係一般保險，好似車險、商業險等，咁係咪壽險就唔關事呢？

喺極端天氣下，個人保險產品有冇得賠，要視乎買咗乜嘢，當中人壽保險就最簡單，唔理係咪極端天氣，任何原因導致嘅死亡都受保（除咗指定年期內自殺，多數1年）。咁問題係明知打緊十號風球，仲走去滑浪然後發生意外死咗，咁同自殺無分別喎。講係咁講，但咁樣做其實只係冒險，唔係自殺，自殺情況都需要有理據證明，例如已留遺書或向親友透露等。

醫療保險一般需要住院或者做手術先會賠償，費用實報實銷，原則上只要證實投保人有醫療需要之下入院，有關醫療費用都可以索償，不過極端天氣下發生意外導致受傷，緊急情況多數Call白車送去公立醫院急症室，醫療費用好平，基本上作用不大。

至於意外保險，無錯只要符合條件，好似傷殘或死亡，都可以獲得一筆賠償。另外部分意外保提供醫療保障，但需要證明是由意外導致受傷。保險條例中「意外」嘅定義，除咗突發、非疾病，涉及受傷的話最好屬於外在、可見，即係要造成外傷，例如有傷口、骨折或瘀傷等。

另外仲要留意意外保條款中通常會有「刻意曝露在某項風險之下」或「危險活動」不保事項。例如天文台已經掛咗十號風球，又提醒市民要遠離岸邊，仲走去滑浪或者追風，出咗意外要索賠，好大機會係冇得賠。

保險嘅作用係當遇到意外嗰陣，可一解自己或家庭嘅燃眉之急，但切忌因為有保險在身，明知惡劣天氣下仍然罔顧自身安危以身犯險，始終條命先至係最寶貴。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。