【保寶達人】加快理賠先做一個手續 唔怕醫保賠償變遺產

早排電視投訴類節目又再出現有關保險理賠嘅個案，呢類電視節目通常「描繪」到申訴人好慘，「塑造」到保險公司「識收保費，出事賠償好慢」，淨係識得用一堆保單條款拖延理賠。

好似有一單關於醫療保險嘅個案，投保人喺治療期間離世，保險公司發放嘅賠償即時變咗遺產，屋企人唔可以咁快拎到應燃眉之急，搞到上節目投訴。

好多人都唔知，醫療單同人壽單嘅理賠方式係唔一樣。人壽保險嘅賠償金會交畀指定受益人，不屬於遺產，但醫療保險就會畀返保單持有人，之但係一般醫保嘅投保人通常都係受保人，所以咁唔好彩中途離世，醫療費用賠償就會變成投保人遺產嘅一部分，遺產繼承人要等完成遺產承繼手續之後，筆賠償金先可以到手。

所以唔係保險公司拖延理賠，只係要跟條例做，一定要變成遺產，至於遺產承辦最快都要幾個月半年，如果投保人生前無立俗稱「平安紙」嘅遺囑，時間就要更加長。

其實醫療保單有一個做法，可以避免賠償落入遺產承辦，就係「增加指定委托人」增加一位有可保利益嘅指定親屬落張保單度，可以一開始投保時加，或者中途加亦可以，但如果到投保人病情惡化先加，就要留意保險公司係需要確保病人喺清醒狀態下做決定。

所以如果病情真係唔樂觀，可能就要考慮及早安排「增加指定委托人」，同時又要平安紙做好遺產分配，例如特別指明保險賠償由邊個領取，咁樣可以避免爭拗，縮短少少時間。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。