【保寶達人】溫馨提示：保監局擬明年恢復徵收中介人牌照費

近幾年愈多愈多人入行做保險，其中一個原因係相對其他金融行業，保險入行成本比較低，只係需要畀幾百蚊考試費就可以掛牌，不過出年9月23日開始，應該就再冇呢支歌仔唱喇，申請新牌照或者續牌，可能要畀一筆唔少嘅費用！

近幾年好少人會提起保險中介人牌照費用，因為喺保監局新嘅保險中介人監管制度下，頭5年（2019年9月23日至2024年9月22日）嘅牌照申請費用會獲得豁免，即係申請牌照免費，皆大歡喜。

不過5年就快過，牌照費用豁免期完咗之後又點呢？有大隊長話保監局經已向業界團體發出諮詢文件，徵詢對於明年恢復收取牌照費用嘅安排，相信轄免期後十之八九都要畀，只係要畀幾多同點樣畀法，所以想入行嘅就要留意2024年9月22日呢個限期，要續牌嘅都要有定準備！

當然申請專業牌照要收費，絕對係天經地道，因為其他金融發牌機構都係一樣，而且監管機構的確有好多工作要做，需要有收入，而且對於大部分保險中介人，畀少少錢攞個牌或者續個牌，應該都唔會係一個大問題。

截至2023年9月底，持牌個人保險中介人數目有成112,923人，但係超過11萬持牌中介人當中，其實唔係個個都咁Active，有唔少人係有份正職，兼職做保險，又或者有牌但冇做，又或者轉咗行但牌照未到期，佢哋未必願意畀一舊錢續牌，咁可能會令整體中介人人數下跌。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。