【保寶達人】《施政報告2023》中一個隱藏的保險業利好措施

發表冇耐嘅《施政報告2023》，大家嘅焦點都放喺鼓勵生育同樓市減辣方面，保險相關措施一向唔算好多人留意，講真今次都係促進大灣區保險發展同綠色可持續金融之類嘅進度更新，而海上保險呢啲對一般市民基本上係無影響。

不過留心啲睇，今次其實係有一項措施間接同保險業有關，就係醫管局會推出「醫健通」升級版，喺未來 5年建立綜合醫療資訊基建，完整咁管理個人病歷。當局會透過一人一健康戶口，統一存放公私營電子病歷同整合醫療服務治理流程。

其實呢項措施原意係促進大灣區跨境醫療協作，令更多港人當北上就業及退休，醫療配套更加完善。不過，如果到時真係一人有一個健康戶口，要查一個人嘅病史亦會變得方便好多，相信可以幫到保險公司加快醫療保險理賠流程。

雖然措施原意唔係為咗保險業，但係呢項措施對於保險公司同投保人雙方都有好處，保險公司可以更方便快捷咁查閱病歷；至於投保人方面，如果索賠係合理，甚至主動交出電子病歷，亦可以加快理賠進度，更快獲得賠償。

不過搞IT基建保寶達人就唔係專家，通常政府項目由招標到開發再到測試都需要幾長時間，所以呢項計劃最少會係一個5年計劃。希望到時正式開通之後，真係可以做到咁有效率，帶畀業界同市民雙贏局面。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。