【保寶達人】公開「醫生黑名單」係有心定無意？

依家經常都會聽到醫保索償爭議，當中有唔少係保險公司懷疑索償個案嘅醫療需要真確性，呢方面同醫生息息相關。最近就有間保險公司公開咗一份醫生黑名單，指名道姓不接受其治療費用索償，震撼全行。

其實成件事非常簡單──有醫生見病人有保險，就乜都收貴啲，有啲就去美容變咗做醫療係非醫療需要，保險公司決定唔再忍，於是就出Blacklist。的確對於醫保嘅條款同賠償機制，可能醫生都相當熟悉。有醫生收額外不合理費用，安排不必要療程情況係存在。你估保險公司唔知咩？ 其實保險公司自己都有一啲慣常或者合理收費嘅準則，唔係亂嚟！

今次咁夠薑開第一槍嘅，係專攻醫保嘅保柏（Bupa），之前喺網站公開咗一份「不認可服務提供者名單」，當中包括4名本地註冊醫生同一間皮膚美容專科中心，保柏表示名單上嘅醫療保健服務提供者未達水平，明年起不接受其提供治療費用索償申請咁話。

直接指名道姓，相信保柏出得呢份黑名單，已經累積唔少個案同證據，但係份名單係基於咩準則同因素整出嚟，就冇再解釋。於是即係引來醫療界回應，話對個別醫生專業有懷疑，應該先向香港醫務委員會投訴喎，咁樣出個黑名單好唔公平。

面對醫療界咁唔Like，保柏於是「彈出彈入」，出咗冇幾耐就主動澄清呢份名單係「保柏環球（Bupa Global）」公布，同埋已經暫停使用呢份名單，現時亦唔會有任何名單公布，仲非常客氣咁話百分之百尊重醫生嘅專業自主。

黑名單事件背後，係過去十幾廿年，醫療通脹係咁升，講到尾，係有部份醫生和客戶濫用醫保索償導致醫療通脹先係癥結所在。保寶達人就認為，醫療療程同收費嘅合理性，本身真係好難評估，講到尾都係要醫療界以專業行先，同有冇保險、費用高低冇關係，有買保險就收貴啲嘅情況，醫療界本身都要留意，濫用醫保最終令保費增加又或因不合理索償而遭拒賠，最終損失既只會係投保人。

今次事件相信隨住呢份名單「暫停使用」而告一段落，但留意保險公司並無表示撤回名單，而係「重新審視及評估」。所以醫生黑名單「彈出彈入」絕對係有心唔係無意。醫生話晒係專業人士，好緊張名聲，開晒名又畀傳媒報道晒出嚟，相信都會產生少少寒蟬效應，令大家認清醫保既原意，係為真正有醫療需要既客戶提供更好既服務和選擇。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。