【保寶達人】關於保險中介人牌照收費 Agent有乜Say？

保險中介人牌照收費公布銀碼之後，業界即時有唔少聲音，有支持亦有反對，為咗更具體知道大家嘅意見，香港人壽保險從業員協會（保協）早排就做咗個「保監局徵收牌照費網上意見調查」，收到超過3,200個回應。

對於保監局要重新徵收牌照費，絕大部分受訪者（99%）都認為係合理，因為申請牌照要收費天經地義，喺業界自行監管時代都係一樣。

不過大家認為收幾多先至合理呢？如果大家仲記得，係保監局未接手中介人監管事務之前，收開係每3年$480，除開只係$160蚊一年，所以大部分受訪者（87%）都希望可以「回到過去」，保持收返呢個費用。不過保監局一開口就收$2,100，相信就算真係有得減啲，都同之前爭好遠。

如果真係收3年$2,100，係咪逐年咁收會好啲？業界兩種意見都有，而且不同意逐年收嘅比同意仲多少少（53%對45%），其中有受訪者好理性咁分析，話逐年收仲涉及更多行政成本，呢點保寶達人都同意，因為政府部門嘅行政成本真係好高。

既然加咗價，梗係要畀返相應提升嘅服務。保監局主要係做監管，中介人除咗「課金」畀監管自己嘅機構去監管自己之外，仲可以要求乜嘢升級服務？大部分受訪者（77%）都表示保監有責任澄清保險的謬誤或不實消息、教育市民保險重要性，同埋提供培訓同行業資訊，亦有受訪者提出打擊中介公司同回佣問題，因為保障代理人嘅長遠權益，間接亦令客戶可以得到更佳保障。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。