【保寶達人】打入香港保險業三甲話咁易？

最近有間保險公司接受傳媒訪問，上年上任嘅集團主席就表示未來5年要成為不同地區市場嘅保險業三甲，當中就包括香港。

喺香港經營業務嘅保險公司各有特色同定位，而銀行保險亦有一定客路，不過咁多年以來，保險市場長期由三間大公司主導。

所以要挑戰三甲之位，關鍵係用乜嘢指標去比較。當然最具說服力嘅計法，係計年度保費收入。不過，保險業比較特別，有時啲保險公司會用其他指標。

第一種係百萬圓桌（MDRT）會員數目。MDRT絕對係行業指標，理論上亦反映到旗下Agent團隊嘅實力。全球只有約1%保險從業員做到MDRT，而香港就高啲，但都只係5%左右，所以如果要鬥多MDRT，團隊規模較大嘅公司會佔優。

第二種計法係銷售能力，即係鬥多單。對於一啲中型公司，唔使張張都要簽大單，細細單但密密食，都不失為一種可行嘅市場策略。

其實，5年唔係短時間，市場可以發生好大變化，好似近年第2、3位都有執位，而且保險公司之間併購時有發生，未來真係凡事都有可能㗎！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。