【保寶達人】「醫生黑名單」事件後續之「醫生反擊戰」

大家仲記得個幾月前保柏（Bupa）嘅「醫生黑名單」事件？當時保柏極速「彈出彈入」，澄清個名單係「保柏環球（Bupa Global）」公布，唔關保柏香港保單持有人嘅事，但唔好以為件事就咁告一段落。

由於保柏當時未有解釋「醫生黑名單」嘅準則係點定，畀人感覺唔夠透明度。醫生最緊張名聲，開晒名又畀傳媒報道晒出嚟，嬲嬲豬都好合理。其中一位榜上有名嘅專科醫生喺名單剛公布就發聲明，表示對保柏決定「深感錯愕及遺憾」，話會保留一切法律權利。

到今年一開年，呢位專科醫生就入稟高等法院控告保柏誹謗，要求法庭頒布禁制令，禁止保柏以任何形式發布誹謗性言論，仲要求保柏公開道歉同賠償。由於涉及法律唔方便評論，但保寶達人就認為呢件事可以成為一次「關公」事件示範。

其實各大寶號都好關注濫收醫療費用問題，喺內部都有措施對應。首先，有啲內部真係有所謂嘅「醫生黑名單」，用來提醒理賠團隊要留意，加倍小心處理相關索償個案，但好似保柏咁公開黑名單就係前所未見。

講開又講，可能上咗名單都唔代表係濫收，因為濫收準則係見仁見智，唔能夠排除有啲「大國手」因為名氣夠大，收嘅醫療費用比一般醫生高出好多，都一啲都唔出奇。咁公司內部出個名單提一提同事特別留意，喺理賠時「合理及慣常」（Reasonable and Customary）條款未必可以Cover晒「名氣」加持嘅高昂醫療費用。

另外，大多數醫療保單都有「醫療所需」（Medically Necessary）同頭先講嘅「合理及慣常」條款，目的都係避免濫收同濫Claim醫療費用。保險公司係有權用以上條款拒保「不合理」或「非必要」嘅醫療費用。

總之都係果句，醫保既原意，係為真正有醫療需要嘅客戶提供更好嘅服務和選擇，濫用醫保最終只會令保費增加又或因不合理索償而遭拒賠，最終損失嘅只會係投保人。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。