【保寶達人】乜又係你呀？「保費融資」！

「保費融資」喺理想狀況下確實有好處，投保人透過向銀行借入高額保費，借助槓桿效應以相同本金倍增保單，實現唔同嘅財務同保障目標，原意係相當正面。

不過，現實中大多數人只係從投資角度睇「保費融資」，近年息口升勢導致不少「爆煲」個案，揭示咗市場上一些離奇現象。

有人將「保費融資」比喻為買樓，稱之為「金融樓」，亦有銀行職員將其類比為按揭，如果職員冇解釋清楚，或者客戶只係一知半解，會誤以為類似「買磚頭」好穩陣咁，但實際上兩者相似嘅只係貸款方式，但風險係有分別。

舉個例，有70幾歲投保人參與「保費融資」，兩年後發現每月戶口扣除嘅高息，令利息支出倍數上升，但距離張單Break-even仲有一段漫長歲月。

亦有人誤以為問題必定出喺保險公司身上，忽略咗銀行喺整個過程中至關重要嘅角色。保險公司僅按程序辦理保單，風險同融資利息主要係由銀行負責。

總之，雖然「保費融資」係唔錯嘅投資工具，但佢嘅複雜性同對息口嘅敏感度，係更適合有經驗同知識嘅長線投資者。所以簽約前，投資者應該深入了解條款同風險。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。