【保寶達人】「新資本投資者入境計劃」年中接受申請 投連險有望跑出？

政府正式重啟「新資本投資者入境計劃」，年中開始接受申請，當中容許投資嘅資產就包括投資相連壽險計劃（ILAS），相信各大保險公司同銀行都唔會放過呢個商機。

「新資本投資者入境計劃」各類可投資資產中，包括「由獲准許經營《保險業條例》所指定的相連長期業務的保險人發行的證監會認可投資相連壽險計劃」。冇錯投連險係納入咗可投資範圍，但係對於計劃投資移民嘅高淨值投資者，究竟有幾大吸引力呢？如果佢哋打算投資基金，點解唔直接投資，而要透過保單形式呢？

兩者最大嘅分別之一，係投連險屬於保單，會提供身故賠償同可以指定受益人，部分計劃甚至可以更改保單持有人同受保人，方便策劃傳承財富予下一代，對高淨值人士都有一定吸引力。

不過投連險嘅身故賠償，一向唔係宣傳重點，如果計劃投資移民嘅人士想有更高保障，保障型投資相連壽險（PLP）或者可以派上用場，因為規定身故賠償喺受保人65歲前最少為應繳總保費150%，最高甚至可以去到250%，不過PLP一直唔係好做得起，唔知到時會唔會吸引更多保險公司推出PLP產品呢？

仲有一點要留意，係通常投連險計劃內有唔少基金可供選擇，相信到時唔會全部都會獲納入合資格投資名單，到時需要清楚標明符合投資移民資格嘅認可基金，而相信會集中係投資本地資產嘅基金。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。