【保寶達人】500萬保險港女短片爆紅做保險收入大拆解？

呢位女主角其實唔係第一次喺業界出名，上年年頭已經因為喺個人社交平台上載性感照，引來其他行家抨擊。保寶達人唔開名講喺邊個，想知嘅Search「500萬保險港女」好易搵得到。

短片女主角今次又再成功引起話題，但網民留言就以負評居多，有人唔信咁年輕做保險搵到咁多，甚至抨擊佢唔係賣保險係賣身材。事件反映社交媒體作為一個新興宣傳渠道，係一把雙刃劍，可以令你短時間爆紅，但負評亦會隨之而來。

不過對於年輕保險人，社交媒體始終係一個不可或缺嘅宣傳途徑，可以向潛在客戶群分享最新保險資訊同分享個人生活生滴，令潛在客戶及現有客戶了解自己更加多，更易打開話題，關鍵係點樣拿捏，分享去邊度玩邊度歎，的確可以塑造事業成功嘅形象，但尺度應該自己把握好。

至於網民好奇嘅保險搵幾多話題，其實有數得計。短片女主角講過自己係公司最年輕嘅COT（超級會員），如果以2023年度MDRT業績為標準，係可以計佣金、收入或者保費。

如果用保費去計，比較難知道實際收入有幾多，因為唔同產品佣金比例唔同，好難一條大數睇到實際收入。而COT保費要求係大約係503至1,000萬。

當用收入去計好喇，COT年度收入係要求218萬以上，睇落距離500萬仲有一段距離，但係COT收入個Range上限可以去到436萬左右。

最後係計佣金，COT佣金要求約126萬至252萬，但只係計首年，未計舊單續保嘅Renewal佣金，而續保佣金根據產品有唔同比例，如果Agent有一定年資，呢部分嘅收入都唔少，幾百萬年收入絕對係有可能。

不過，呢位女主角咁後生就可以做呢個業績的確係極少數嘅，一般嚟講都需要累積一定年資同客戶，到時達到COT就唔係咁困難嘅事。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。