【保寶達人】送兔迎龍 保險業業績有望一飛沖天？

送兔迎龍，保寶達人龍年第一Post祝大家今年飛龍在天，業績一飛沖天。雖然上年復常唔係好夠力，但保險業韌力唔錯，頭三季嘅業績相比疲弱嘅經濟，真係已經交足功課。

保監局公布首三季保險業臨時統計數字，當中首三季長期有效業務保費收入下跌1.7%至3,748億港元，不包括退休計劃的新造保單保費1,465億港元，按年上升30.6%。其實疫情期間業務重心由內地轉移返本地，保險業生意一直保持穩定，令到市場更加平衡，所以首三季收到3,748億，新造有1,465億，喺大家收緊開支嘅環境下，呢個成績絕對收貨。

隨住稅季又到，因為少咗臨時減免措施，今年張稅單普遍銀碼大咗，相信扣稅年金銷售數字仍然持續穩定，首三季保險公司共發出約24,300份合資格延期年金保單，涉及保費16億，佔個人業務總額1.1%。

雖然第三季內地訪客新造業務保費按季下跌32.9%至150億港元，但係首三季計都達到468億，佔個人業務總額32%，見到內地訪客生意陸續恢復個勢。如果大家近排有行廣東道，會發現名店排隊人龍再見，四周圍重新見到身光頸靚嘅內地旅客，配合人民幣匯率持續回升，睇嚟前景都會唔錯。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。