【保寶達人】今次嚟真！保險中介人虛報學歷將面臨刑事檢控！

保監局升級檢控功能！除咗開始對保險公司嘅巡查審罰，喺保險中介人專業操守方面亦會加強執法，更表明對虛報假學歷者唔會手軟！

保監局會檢控，其實聞樓梯響咗好多年。由2017年接手監管保險公司，到2019年接手監管埋中介人，之後經歷3年世紀疫情，其實疫情前已聽到保監局正在積極成立檢控團隊，但係一年又一年，到最近高層出口術，透露第一單由保監局調查、執法同檢控嘅案件，將會喺今年內發生，當中仲講明牽涉刑事調查。

當然係乜嘢案件現階段未知，保寶達人就好想知會唔會同中介人有關。因為耐唔耐保監局都有中介人用虛假學歷證書嘅消息公布，以前就通常以有關人士被禁止申請成為持照人士一個指定年期作結。

之但係，其實喺2019年9月生效嘅新持牌保險中介人規管制度下，在申請牌照或認可時向保監局提交虛假資料，屬刑事罪行。任何人士干犯和被裁定有關罪行，將可被處最高第5級罰款和監禁6個月。

所以每次有相關公布，保監局都會表明會毫不猶疑地檢控任何企圖於申請牌照過程中遞交虛假學歷證書嘅人士，最近保監局高層仲講到明，如果日後再出現保險中介人假學歷事件，唔再係吊銷牌照咁簡單！

如果保險中介人用虛假學歷，絕對有違專業操守，後果亦非常嚴重，所以各大隊長喺請人時都要加倍留心呀！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。