【保寶達人】做保險唔好行差踏錯！有監管㗎…

上次提到，保監局開始發揮檢控功能，除咗明言會檢控用虛假學歷嘅保險中介人，最近仲派出特別部隊到保險公司做調查，聽聞查得相當認真同嚴謹。

保監局成立目的就係監管保險公司同中介人，其實一開始就埋緊班去做法律嘅野，但到而家先至做，係因為佢哋之前請唔夠人，新嘅管理層成員又未埋位，所以當最近成功埋班，就終於開始出動做嘢。

近期IA就派員去保險公司做調查，聽講已經查完一間，而家就查緊第二間，至於查咩呢？基本上就派一隊人去間保險公司要求睇資料同文件，主要睇嗰間公司嘅Operation，睇Underwrite，財務部、培訓部，成個投保核保流程係點做之類，總括來講就係搵錯處。

聽聞IA專員逐個部門去掃蕩完之後，會每個職級抽一個代表出來做Interview，至於In乜嘢就唔知，聽講而家查緊嘅嗰一間保險公司就抽咗20個人去In，要In到今個月底。

講返IA嘅行動，保寶達人聽聞有公司被捉到旗下有Agent幫客喺網上交保費，其實件事就已經發生一段時間，有可能係疫情期間好心幫客戶交保費，但而家Check嘅時候先Check到出嚟，咁IA就問呢間保險公司，點解個Agent咁做你哋都接受嘅？

唔想好心做壞事，除咗叫客戶自己交，Agent收客戶現金再交保費嘅情況都唔少。有啲公司會容許Agent收客戶現金交保費，但每年設有一個上限，之但係大家都係要記住，收咗錢就好盡快上繳公司喇！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。