【保寶達人】20億破健力士紀錄保單買啲乜？

相信好多行家都有聽聞，香港賣出一張「世一」保單，總值2.5億美元，即係大約20億港元！打破健力士世界紀綠嘅最高價值人壽保單紀錄。究竟係邊位買呢張保單？買嚟做乜？

據市場消息，買呢張天價保單嘅客戶，係一位來自亞洲嘅超高淨值人士（Ultra high net worth individuals，UHNWI），擁有多重國籍，投保終身壽險計劃主要用來進行財富傳承規劃。

不同國家對於遺產稅嘅徵收政策有別，所以好多擁有多重國籍嘅人士，喺規劃時利用保險賠償規避稅務風險係好常見，不過似乎呢位客戶張單就唔係咁用喇！

億萬富豪好注重私隱，特別係講緊巨額財富傳承，保單可以保持高度隱私性同自主性，好多時佢哋買大額保單，係用來配合埋信託，將受益人設置為信託基金，可以令財富傳承安排更加切合個人意願。據聞呢張單亦係用來Setup保險信託，即係如果投保人日後離世，信託基金就有最少20億港元進帳！

而且呢類終身壽險通常設有分紅機制，除咗身故保障外，保險公司會向投保人派發非保證紅利，有機會獲得額外回報，既保護資產又可實現增值。

由於大額保單涉及龐大金額，選擇合適嘅保單配置同風險管理策略至關重要，好需要專業嘅保險中介人從中提供意見及協助，以確保財富傳承萬無一失。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。