【保寶達人】旅行唔好彩遇著天災有冇得賠？

一般情況下，如果旅行目的地出現保單條款內指定嘅天災，通常包括地震、山火、洪水、颶風或火山爆發等，受保人可透過「取消行程」、「旅程中斷」或「延誤保障」條款，就受到嘅不同程度影響，向保險公司申請賠償。

要留意，大部分旅遊保單都列明要出發前幾多日內發生嘅災害先受保障，如果受保人想取消行程，一定要睇清楚。

另外，唔好以為旅遊保有天災相關保障，就一定有得賠。留意如果天災發生之後先投保，係唔會得到保障㗎！因為所有投保前已存在嘅狀況，都屬於不保事項。以今次台灣地震為例，喺地震發生後先投保，就算目的地喺正地震災區，因為所有潛在人身安全風險都屬於投保前已存在嘅狀況，受保人係唔會獲得保險賠償。

所以幾時都話買咗機票同訂好酒店之後，就要盡早買旅遊保，咁樣先可以最大限度降低一旦發生天災所帶來嘅損失，因為只要保單開始生效，出發前出現因天災或外遊警示等各種不可預料嘅受保事故而影響行程，都可按保單條款申請賠償。

仲有，旅遊保險保單一般會列明提交索償申請嘅期限，最長大約一個月，如果因天災而需要索償，就一定要喺限期前通知保險公司同提供相關證明喇！

以上旅遊保貼士只係適時提提大家，當然去旅行梗係最好用唔着旅遊保啦！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。