【保寶達人】何伯450萬買年金真係Work？唔好忘記呢一個關鍵

「何伯」事件引來全城關注，有財務界人士提出何伯用450萬儲蓄買年金，每月收3萬4千幾蚊「月收入」，足夠同愛妻「新何太」過唔錯嘅退休生活。如果何伯長命百歲嘅話，仲有賺添！

另外，由於筆年金放喺政府度，唔會一下子畀「新何太」使晒，所以何伯子女都可以放心咁話。但唔好忘記，年金都有受益人，而寫邊個就係關鍵。何伯咁愛新何太，份年金受益人唔使問梗係新何太，一旦何伯身故，受益人新何太可以接手繼續領取年金，保證至少得到相當於已繳保費105%嘅年金收入，佢亦可選擇轉為一筆過身故賠償，亦一定唔會少過已繳保費總額，所以最終450萬大部分咪又係入「新何太」袋！

仲有一點都非常關鍵，年金個回報機制係等資金慢慢回籠，同年金鬥長命，同暮年戀一樣要求細水長流，咁就唔係幾合「新何太」嘅心意喇！鑽戒、名錶、足金龍鳳鈪，仲有老公打本100萬做生意，相比獲利速度咁慢嘅年金，應該好難滿足到佢嘅需要喇！

咁年金放埋一邊先，保寶達人反而好奇何伯本身有冇買落人壽保險。但如果有，受益人寫邊個亦係關鍵。因為大多數情況下，人壽保險受益人會寫子女或配偶。如果何伯而家同子女已經反晒面，何伯好有機會向保險公司要求修改保單受益人為「新何太」。

呢個時候，就要留意份保險嘅受益人，究竟係屬於「可撤換受益人」定「不可撤換受益人」喇。假設受益人係仔女，如果係「可撤換受益人」，保單持有人即係何伯就有權更改受益人為「新何太」，而毋須知會保單列明嘅受益人，咁何伯仔女想阻止都冇辦法。

但係如果一開始就揀咗「不可撤換受益人」選項，雖然唔係一定改唔到，但何伯如果想更改受益人，就必須先得到保單列明嘅受益人同意先得，到時班仔女唔肯的話，更改受益人難度就相當高。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。