【保寶達人】旅行去登山潛水 突然病發保險包唔包？

今年2月內地有單熱搜，有個上海大學生去尼泊爾攀登珠穆朗瑪峰時遇上高山症，因為出發前買咗旅遊保險，佢想聯絡保險公司要求派直升機救援，但保險公司以受保範圍唔包尼泊爾而拒絕，最終不幸失救身亡。

旅遊保險一般提供緊急醫療運送保障，但要留意該保障只適用於每份保單所載明嘅地區範圍內，如果唔包括，就要自己聯絡同聘請當地嘅醫療護送服務提供者。仲有一點值得商榷，就係投保人係咪真係要求保險公司派直升機救援，因為緊急醫療運送只提供運送，並不具救援作用。所以如果喺當地遇到危急狀況，應該第一時間報警求助。

至於身故賠償，旅遊保險主要保障旅遊期間發生嘅意外，並唔係疾病。保險投訴局轄下保險索償投訴委員會今年3月公布2023年保險索償投訴數據，當中就披露咗一單Case，有市民買咗旅遊保險，旅遊期間因高山症死亡，死亡原因列明死於意外，但因為保險公司定義高山症係疾病，因此不獲賠償，而委員會都裁定保險公司做法合理。

市面上大部分旅遊保險都將意外定義為突發、外來、非預期嘅事件，而疾病導致嘅死亡或傷害通常不在此範疇內。同登山遇上高山症被定義為疾病一樣，唔少潛水事故亦係因為呢個原因，被排除於旅遊保險賠償範圍之外，例如潛水愛好者喺潛水時遇上減壓病（潛水夫病）等，同樣被定義為疾病，唔符合意外嘅定義，所以保險公司有權拒絕此類賠償。

而家市面上有旅遊保都話包登山、潛水、攀岩等運動，但都係嗰句要睇清楚條款，有乜唔明最好直接問清楚保險公司。極限運動並無既定嘅定義，唔少極限運動一般旅遊保險都唔Cover，所以如果想有呢方面嘅保障，最好就係問清楚極限運動嘅營運商有冇得提供。

最後祝各位旅途愉快，最好就唔使Claim保險啦！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。