【保寶達人】今年首季毛保費1,651億港元 新造保單保費升近4成

又到咗行業派成績表嘅時候喇！今年第一季度香港保險業成功取得「開門紅」，對比去年同期，各項業務表現都有進步！

保監局最近公布今年第一季度保險業數據，第一季度毛保費總額達到1,651億港元，較去年同期上升12.2%。再深入啲睇各項業務數據，長期有效業務嘅保費收入總額有成1,443億港元，同比亦都上升14%，整體穩健增長。

至於新造保單保費增長更加有驚喜，達到653億港元，同比上升39%。其中個人人壽及年金（非投資相連）業務嘅保費收入佔633億港元，而個人人壽及年金（投資相連）業務的保費收入18億港元。另一方面，來自內地訪客嘅新造保單保費錄得156億港元，同比顯著上升62.6%，佔個人業務總新造保單保費24%，顯示內地訪客生意逐步回升。

表面上睇，香港保險業喺今年第一季度嘅表現相當唔錯，況且而家經濟市道欠佳，有咁嘅增長實在可喜可賀。但係我哋都唔能夠忽視，呢個只係一個季度嘅數據，而且數據係同上年第一季比，因為上年剛剛通關同經濟復甦，個基數較低，所以比較下有升幅都好合理。

所以，保險業係咪真係經得起考驗，關鍵係之後嗰兩、三個季度嘅成績，係咪都仲Keep到穩健增長，大家拭目以待啦！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。