【保寶達人】使用虛假學習證書 禁止重投業界三年罰得重唔重？

如果有留意開保監局嘅監管資訊，耐唔耐就會見到有保險中介人用虛假學歷證書被處罰嘅消息公布，通常以有關人士被禁止申請成為持牌人士兩至三年作結，咁樣究竟有冇阻嚇作用呢？

使用虛假學歷證書究竟有幾嚴重？作為參考，根據現行《刑事罪行條例》，任何人士如製造、使用或管有虛假文書或虛假文書的副本，均屬違法，一經定罪，最高刑罰為入獄14年。虛假學歷證書可視為虛假文書嘅一種，如果認真執法，都咪話唔大鑊。

所以保寶達人就覺得，如果只係禁止提交虛假學歷者重投業界兩、三年，阻嚇作用好有限。首先，提交虛假學歷嘅人，通常係近幾年入行，喺入行冇耐就被揭發，對佢哋來講損失未必太大，做唔到保險大不了咪轉行。對於根本冇打算回歸保險業嘅「前代理」，就算禁幾多年都唔當一回事。

另外，連最低學歷要求都冇嘅人，好大可能之後都唔會符合到。用得虛假證書，即代表未符合成績要求。當然呢兩三年佢可以自修報考DSE，或者讀一啲認可課程獲取合資格學歷，但讀書要唔少時間同精力，要令一個成績差嘅人，扚起心肝讀書唔係咁容易。

環顧呢幾年嘅虛假學歷個案，好多時都唔開名，加上除咗禁止重投業界罰則之外，並冇罰款之類嘅其他代價，所以唔打算入返行的話，好似做錯事都冇乜後果咁。

當然，使用虛假文書達到個人目的，對於講求道德誠信、涉及大額資產嘅職業，絕對係難以接受。不過，相信每個個案情況都有啲唔同，保監局相信對呢類走精面嘅人係有自己嘅睇法，罰幾多年，或者告定唔告，相信係有一套自己嘅標準。

事實上，喺2019年9月生效嘅新持牌保險中介人規管制度下，喺申請牌照或認可時向保監局提交虛假資料，屬刑事罪行。任何人士干犯和被裁定有關罪行，將可被處最高第5級罰款和監禁6個月。早前保監局高層就放風，話今年內將會有刑事檢控嘅個案出台，會唔會就係關於虛假學歷，用來提升阻嚇作用呢？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。