【保寶達人】前代理挪用客戶保費 禁重投業界14年之外仲有後續？

保監局早排公布一個違規個案，一名前保險代理挪用4名保單持有人嘅保費，涉及約160萬元人民幣，局方罕有用行為性質卑劣來形容，仲禁止呢名前代理申請牌照14年。

呢單嘢係保險圈子都議論紛紛，對呢名前代理身份好奇。由於保監局聲明有一段話假如本案應用現行嘅規管制度，係可施加終身禁令，以反映局方對本案顯示嘅嚴重不當行為程度嘅憎惡同零容忍態度。咁相信呢名前代理係由經舊制度註冊，通常釘牌上限3年，禁14年係局方「追加」，用來Match到接近終身，從而向業界發出明確阻嚇訊息。

保寶達人就覺得，挪用客戶保費成百幾萬，行為等同盜竊，案情的確非常嚴重，相信唔會就咁禁止申請牌照咁簡單，因為如果當事人冇打算重投業界，基本上冇後果。的確保監局透露正透過簽署一系列嘅諒解備忘錄，將案件轉介至其他執法機構處理，相信個案會有後續。

其實呢單嘢向業界傳遞出一個重要信息，就係客戶要交保費，唔應該經代理手。據保險業監管局《持牌保險代理人操守守則》，「保險代理只可在其委任保險人或委任代理機構授予的權限範圍內，收取保費的付款。」換言之，正常情況下，保險代理不能向客戶收取現金款項作為保費。

事實上，大部分保險公司明文規定，禁止由第三者代交，或直接將保費交予保險代理代交，一方面係為防範打擊洗黑錢，杜絕不明來歷嘅資金，另一方面係希望保障客戶利益，避免保險代理因不當處理客戶款項而令客戶蒙受損失。

之前幾年疫情，內地訪客交保費遇到困難，呢個灰色地帶係存在。但通關之後，內地訪客可以親身來港交保費，保險公司向來亦有官方渠道畀內地客戶交保費， 所以奉勸大家代客戶交咗保費先，或者叫客戶滙錢入自己戶口之類嘅操作，真係可免則免喇！有乜依郁，保險公司或監管機構要揸正嚟做，就唔單止無冇咗份工，可能連牌都吊銷埋！

因為就算冇咁嚴重，只係停牌3年甚至更短時間，都唔好以為只係小事，3年之後又一條好漢，皆因到時再向保監局申請牌照，係有機會因為「適當人選」（Fit and Proper）理由而拒絕發牌。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。