【保寶達人】小心踩到地雷！幫客戶交保費變挪用客戶保費

相信好多行家都知，唔少保險Agent因為同客戶Friend，有時候會為客戶代交保費，又或者貪方便，用個人戶口接收客戶轉帳嘅保費，但原來咁樣係有好大風險，當出咗事先嚟後悔已經太遲。

皆因保監局最近公布一單保險中介人違規個案，今次就開埋名，指呢位陳先生挪用兩名保單持有人繳交嘅保費，導致保單失效，禁止佢34個月內申請牌照。

有行家就覺得，客戶保費暫時存入Agent帳戶時有發生，可能Agent因為太忙唔記得咗交畀保險公司，使唔使停牌近3年咁耐呀！講真，Agent幫客戶交住保費先，特別係疫情期間，或者客戶轉帳畀Agent當交保費，呢類情況的確唔罕見，但係今次個案保監局畀咗業界一個好清晰嘅Message，就係會嚴打呢類違規行為！

根據保監局對今次個案嘅說法，34個月已經係一個經過考慮後，比原來輕嘅罰則，皆因陳先生承認不當行為、已全數歸還相關保費、向受影響客戶賠償醫療費用，又同與保監局合作。所以千祈唔好睇輕代客戶交保費嘅風險！

根據《持牌保險代理人操守守則》，保險Agent只可以喺保險公司授權下收取保費，並必須嚴格按照公司規定、管控及時限，將保費支付畀公司。就算所屬保險公司有相關指引，客戶都應該用劃線支票，收款人寫保險公司，再畀Agent轉交保險公司，切勿用現金或過數畀Agent。如果保費同Agent個人資金混合埋，有機會導致無法追蹤已支付保費，甚至Agent一時疏忽唔記得處理嘅話，就可能好似上述個案咁鑄成大錯。

所以任何情況下，保險Agent都應該建議保單持有人採用報價單、保費及續保通知書中所列明嘅付款方法，通常都包括轉數快、網上銀行、繳費靈，甚至自動櫃員機，直接向保險公司繳付保費，咁就萬無一失啦！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。