【保寶達人】回佣灰色地帶你要知！客戶要求回佣可以點做？

保險代理同地產代理，大家都係代表公司Sell客，主要收入都係佣金，地產代理可以合規向客戶提供回佣，但保險代理提供回佣就係違規。

地產代理只要得到公司同意，可以將部分佣金回贈客戶吸引佢哋買樓，寫晒「佣金回贈確認書」有憑有據就合法合理，至於回幾多亦無規定上限。但保險代理嗰邊呢，監管機構講明長期業務保險回佣係唔合規，用禮物去代替回佣亦都係違規。

回佣係好定唔好，站在客戶角度就梗係支持啦，一家便宜兩家著嘛！唔支持嘅就認為回佣會分散咗客戶嘅焦點，有機會導致作出唔適合自己嘅購買決定咁話。

即使規矩一直存在，但現實仍有唔少從業員踏入灰色地帶。因為有啲投保客戶會暗示甚至明示有冇回佣，尤其做開內地訪客生意嘅Agent，相信經常都會遇到。不過，法規清楚指出Agent係唔可以提供回佣嘅，而且當有内地訪客來港簽單，有兩個聲明係客戶簽咗就代表同意嘅。第一係個客接觸到認識到嘅保單，係唔會由國内嘅人推薦；第二就係明白同接受喺香港嘅保單係唔可以有回佣行為，否則有機會作廢。

回佣唔係內地客戶獨有，有大隊長試過有本地專業人士客戶，因為佢哋見多識廣，有時可能會介紹到一啲新客戶畀Agent，但如果屬於大額保單，個介紹人會話自己有份幫手Sell張單，佣金都要分埋一份，如果連Referral個新客都要回佣，咁樣就變成「無牌銷售+回佣」雙重違規添！

咁Agent遇到呢啲要求回佣嘅客戶可以點做呢？有大隊長就建議可以咁講，買保險都係想尋求安全性，如果買完張保單被取消或者中止，就會喪失保障，如果呢段時間有乜冬瓜豆腐嘅話，咁仲邊度有安全感吖！更加重要係如果買張保單會牽涉法律責任，被政府或認定嘅司法機構當做非法行為，咁有乜必要山長水遠嚟香港犯法呢？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。