【保寶達人】騙徒冒認保監局發短訊！保險公司短訊冇Link用有乜影響？

電騙肆虐，騙徒手法層出不窮，相信大家都收過假冒唔同品牌嘅短訊，保險公司都包括在內，但估唔到最近騙徒連保監局都夠膽冒認！

月初保監局接連發出多個提防假冒消息，呼籲市民提高警覺，其中包括留意偽冒由保監局發出嘅付款要求。話說保監局4月份開始發現呢類短訊，最近就再次收到公眾查詢標題為「Insurance Authority Certificate」或「Capital Insurance Certificate」嘅可疑發票，上面載有虛構嘅保監局資料同印章，要求收件人付款。

雖然保寶達人冇收過呢條短訊，但睇嚟騙徒係想偽冒保監局嘅「保費徵費」，的確保監局係有向投保人徵收費用，但要留意實際係透過保險公司向保單持有人按保費收取，即係交保費嗰陣經已包埋，保監局係唔會獨立向投保人收取，所以呢類短訊一定係詐騙！

講開打擊詐騙短訊，保監局今年4月都宣布聯同其他香港金融監管機構推出《保障消費者防詐騙約章2.0》。咁對市民大眾有咩影響？簡單來講，就係所有參與《約章》嘅機構承諾唔會向客戶發送附有超連結嘅即時電子訊息以索取個人資料。

喺最初230間支持《約章》嘅機構中，有73間係獲授權保險公司或持牌保險經紀公司。如果你間保險公司參加咗約章，收到佢哋發出嘅短訊入便有條Link，咁就一定係假冒嘞！但係《約章》唔係強制性，亦唔係所有大企業都加入，市民依然會收到有Link嘅短訊。

其實諗深一層，短訊有Link真係壞事嚟咩？可能保險公司真係有需要提示客戶處理一啲事項或有優惠推廣，有Link係方便好多，但因為騙徒而冇得再用，所以而家就變咗呃人嘅繼續用，正當嘅反而就唔畀用。

既然保險公司短訊冇Link用，有關保險事宜就更加應該靠Agent，正因為有Agent作為溝通，客戶一旦收到有關保險嘅任何短訊，無論係保險公司定保監局，真實定假冒，先問問自己個Agent就冇錯！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。