【保寶達人】香港保險盛事吸引重要旅客來港

疫情後，呢排香港嘅保險業接連有好表現，認真犀利！香港嘅保險滲透率繼續排名全球第一、保險密度全球第二。至於保監局早前公布上半年香港保險業嘅臨時統計數字，毛保費總額有3,109億元，按年升5.1%！

瑞士再保險發布嘅2023年世界保險業Sigma報告，再次肯定了香港作為領先國際金融中心嘅地位，香港保險滲透率全球排名第一，保險密度全球第二，毛保費總額達5,500億港元，喺全球保險市場排名第16位！要知道香港得1,115平方公里大，得750萬人口咋，做到呢個成績真係十分之厲害！

講返本地保險業嘅數字，上半年長期有效業務嘅保費收入升5.5%至2,730億元，主要係個人人壽同年金（非投資相連）業務帶動，相關保費收入升6.9%至2,433億元；不過個人人壽及年金（投資相連）業務嘅保費收入就跌16%至107億元；至於退休計劃業務供款就微升1.9%至151億元。

至於大家好關心嘅內地訪客新造保單保費，上半年埋單錄得297億元，佔個人業務總新造保單保費份額25.7%。呢啲新造保單大約97%係以非整付方式支付（即唔係一筆過支付），當中終身壽險、危疾同儲蓄壽險分別佔59%、29%同3%。

對於目前保險業有好勢頭嘅成績，留意到保監局都希望乘勝追擊，特別係加強海外市場推廣。而家亞洲區內有九間「國際活躍保險集團」，其中三間揀咗香港做基地。但保監局唔會停步，仲會繼續優化保險集團監管框架，以提升香港嘅吸引力。

根據保監局資料，今年5月主持咗國際保險監督官協會嘅「資本、償付能力及實地測試工作小組」會議同埋持份者交流會面。上年12月又主持咗「宏觀審慎監察工作小組」會議。有咗呢啲經驗，未來話會搞多啲可以吸引重要旅客來港嘅大型活動，繼續為行業注入動力咁話。大家拭目以待啦！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。