【保寶達人】今年內地訪客生意持續降溫 下半年會唔會有返起色？

今年上半年內地訪客來港買保險嘅熱潮稍降溫，新造保單保費按年跌6.9%至297億元，如果單計第二季仲按年跌37%至141億元，睇落跌勢加劇，但係國慶前公布嘅刺激經濟措施出台，樓市股市即時一片向好，究竟下半年會唔會有返啲起色呢？

而家下半年已經過咗一半，有睇內地經濟走勢嘅，相信都心裡有數。頭三季GDP增長維持緩慢，房地產價格持續下跌，如果情況持續，內地訪客生意都好難有機會逆轉。

但就喺75周年國慶前夕，內地政府果然推出一系列財政同貨幣政策經濟刺激措施，希望提振消費、穩定房地產市場，同緩解地方政府債務危機。內地股市率先造好，內地樓市曙光初現，如果內房真係Keep到回穩、市場投資情緒改善，內地訪客業務就有機會回復增長。所以下半年內地訪客生意，相信最少保持到上半年個水平。

其實，大家對前景應該要有信心，香港保險產品對於內地訪客仲好有競爭力，特別係內地保險產品減息之後，內地今年9月起下調普通型保險產品預定利率（香港叫保證回報）至2.5厘，如果內地保險產品利率進一步下跌，會提升佢哋嚟香港買保險產品嘅意欲。

仲有一個因素都有影響，保監局近期打擊違規無牌銷售，重災區正正係內地訪客生意，由於違規銷售個案減少，對整體新造保單保費唔多唔少都有啲影響，不過相信只係短期影響居多。因為打擊違規銷售，可以保障消費者同正規中介，長遠會令整體市場發展更健康。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。