［保寶達人］施政報告有乜利好行業措施？跨境醫療政策為保險業創機遇？

上星期特區政府發表新嘅施政報告，入面提到醫療方面嘅發展重點，搞到好多人都好關注同期待。報告特別提到要加強跨境醫療服務，包括同大灣區加深醫療合作、擴大跨境醫療紀錄互通，仲有推動藥物同醫療器械跨境使用。聽落好似同保險無咩關係，不過有唔少業界已經睇緊公司有咩措施或配套，可以捕捉新政策帶嚟嘅機遇。

就以大灣區醫療合作加強嚟講，因應越嚟越多人會跨境睇醫生，保險公司如果可以設計啲新產品或方案嚟迎合呢個需求，好似覆蓋香港同埋大灣區其他城市嘅醫療網絡，俾經常兩邊走嘅人一個全面保障，咁唔係好正咩？呢啲產品同方案唔單止可以吸引新客，仲可以令舊客更加鍾意你。邊間公司最快捉住呢個趨勢，就最有機會脫穎而出。

或者唔少朋友都有聽過，香港公營醫療系統不勝負荷，部分治療嘅輪候時間同私營醫療系統比較可以相差好遠，所以如果保險公司嘅產品覆蓋能夠擴展到大灣區，對於客戶嚟講自然多咗一個求診嘅選擇，更快咁獲得適當嘅治療。另外由於內地嘅治療費用同部分藥物費用亦比香港相宜，某程度上對保險公司亦都帶嚟優勢，等佢哋喺維持應有服務嘅同時有機會去降低成本。

當然，如果要捉住呢啲機遇，保險公司就要諗下點樣調整策略實現跨區域嘅協同發展。好似近年越嚟越多創新嘅保險科技應用，如果可以做到跨境理賠、用區塊鏈技術嚟共享醫療紀錄嘅系統，甚至係用人工智能嚟做實時健康監測同風險評估嘅智能保險產品。呢啲新科技既可以提升客戶體驗，仲可以提高保險公司嘅運作效率。

不過話分兩頭，當保險公司嘅服務涉及跨境成分，咁就意味住保險公司需要適應新嘅監管環境。點樣喺兩地法律法規下運作，確保合規，將會係保險公司面臨嘅主要挑戰。所以當大家期待施政報告建議嘅同時，香港保險業點樣先可以保持自己嘅競爭優勢，確保行業健康發展，呢啲問題實在值得每一個業內人士好好諗下。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。