［保寶達人］香港資產及財富管理業務同比增長逾3.4倍 財庫局研稅務優惠會影響保險業？

近日財經事務及庫務局局長許正宇發表網誌（10月21日）提到香港資產及財富管理業嘅發展情況同新計劃。對保險業界嚟講，相關構思同方向可能帶嚟唔少機遇，值得大家同保險公司留意同思考。

睇返啲數據先，局長喺網誌提到，截至去年底，香港資產同財富管理業務總值去到31.2萬億，淨資金流入仲要比前一年勁升3.4倍。呢啲數字話俾我哋知，香港金融市場確實好有生命力。

另外，入面又提到有數據顯示，亞太區喺2023至2030年間嘅跨世代財富傳承總額將達5.8萬億美元，當中6成嚟自超高淨值家庭。而家香港已經有超過2,700間單一家族辦公室，佢哋當中超過一半管理嘅資產規模都超過5,000萬美元。呢個龐大嘅財富管理市場，正正係保險業可以著力發展嘅方向。

配合上述數據，政府計劃喺稅務優惠方面作出多項優化措施，而比較同保險業相關嘅包括將保險相連證券（ILS）納入合資格資產類別，交易可以獲得利得稅豁免。另外，「基金」嘅定義亦擴闊到包括退休基金，呢個安排相信可以吸引更多退休基金嚟香港拓展業務兼利用本港嘅專業服務，為本港帶嚟長期穩定資金，即所謂嘅「耐心資本」，促進本地資本市場發展。

不過，講到最後，新構思無論為業界帶嚟咩機遇都好，風險管理依然係重中之重。政府對財務機構持有基金嘅監管措施不容忽視，保險公司亦必須嚴格遵守合規要求，同時做好新產品嘅風險評估同合規指引。

呢啲建議同計劃幾時出台？局長提到，佢會同新成立嘅「推動資產及財富管理業發展專責小組」成員進一步討論上述嘅建議措施，有關新措施嘅細節同推出時間，大家暫且拭目以待。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。