保險業發展除咗講專業仲要有……

早前財爺陳茂波就話睇好香港保險業前景，上星期連國務院副總理何立峰都親身嚟香港，喺國際金融領袖投資峰會上面講香港金融業嘅未來發展，仲提出3項建議，包括深化金融改革創新、拓展金融開放合作，以及對接國家發展戰略，足以見到國家對香港嘅支持同重視。

正如有份出席峰會嘅商務及經濟發展局前局長馬時亨所講，國家領導人親身來港，對香港國際金融中心嘅定位係一支強心針。而香港要發展金融業，保險業絕對係其中一個最重要嘅支柱。喺呢個形勢底下，香港保險業界真係要好好把握機會。

事實上，保險業喺香港金融體系入面一直都扮演住關鍵角色。行業唔單止有好齊全嘅產品種類，由傳統嘅人壽保險到投資相連產品都應有盡有，仲有成熟嘅監管制度同埋專業嘅從業員團隊，呢啲正正係我哋嘅優勢。香港如果能夠做好上面提到嘅3項建議，成為更高水平嘅國際資產管理中心、財富管理中心，自然可以提升競爭優勢，並且為國家嘅發展作出貢獻。

不過講到機遇嘅同時，要推動本港保險業發展，除咗講專業，有心都好重要。所謂有心，唔單止係誠信、對客戶有心，更加係肯花時間、花精神推動行業。就好似之前提到「保協」上星期搞咗個「保協大灣區日」，帶啲會員去參觀大灣區醫療機構，仲有機會同當地官員會面，了解下當地發展；原來佢哋今個月仲選出咗新一屆嘅執委會成員，兼構思緊一連串嘅項目幫同業自我增值。

一個行業組織可以維持51年歷久不衰，仲不斷有人加入去支持同推動行業，呢啲正正就係有心嘅體現。如果香港嘅保險從業員人人都咁有心，你話保險業點會唔蓬勃興旺呢？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。