打造健康保險市場其實好簡單?
香港保險業過去幾十年不斷擴展,不過間中亦都有一啲負面新聞,譬如有代理人未清楚分析客戶需要,就介紹咗啲唔係好啱佢嘅嘢,或者有客戶詐騙賠償。呢啲新聞都令我哋不期然咁諗到:點樣先可以令保險市場發展得更加健康?
講真,多一份保障,多一份安心呢句說話一啲都冇錯。保險嘅意義就係喺人生最艱難嘅時刻,伸出援手。但係要令到呢個保障發揮到最大嘅效果,就一定要靠埋大家一齊努力。
最近見到有保險中介訛稱兩名投保人受傷,仲要串謀佢哋一齊詐騙保險公司嘅賠償,最後俾廉署落案起訴。或者有人會話:「咁都係保險公司蝕錢,同我無關喎。」但係呢個諗法係大錯特錯。因為保險公司理賠嗰陣,都係由公司嘅資金池,即係投保人所繳納嘅保費抽取,如果出現大量呢啲詐騙賠償,唔只影響保險公司嘅資金,同時亦會影響佢同代理人及客戶嘅關係。
因為保險運作嘅核心,就係建基於互信。保險公司信任客戶會如實申報,客戶亦都信任保險公司會喺需要嘅時候及時提供保障。一旦呢份信任崩潰,咁保險市場就會崩塌。
所以,保險從業員嘅專業操守非常重要,我哋好應該讚揚嗰啲堅持專業態度嘅從業員。佢哋日以繼夜為客戶服務,用心了解客戶需要,推介最啱嘅保險產品。呢啲專業精神,就係令到保險市場可以健康發展嘅動力。
而作為一個負責任嘅消費者,我哋應該要點配合呢?首先梗係如實申報資料啦,唔好為咗慳啲保費而隱瞞病歷。其次就係認真了解保險產品嘅內容,有唔明就問清楚。最後就係揀選有專業操守嘅保險代理,同佢哋建立長遠嘅合作關係。
講到尾,保險市場嘅健康發展係需要大家一齊出力。只要我哋齊心合力,堅持誠信,保持互信,就一定可以建立一個更加蓬勃嘅保險市場,令到更多有需要嘅人可以獲得適切嘅保障。
保寶達人 – 為您八盡保險天下事
更多保寶達人手記Click Here
任何於本文章的評論或意見純屬來自個別嘉賓/隊長等,並未代表保協之立場。