新一年就到,香港保險業前景亮麗?
眨下眼,2025年就到喇!各位保險業界嘅朋友今年係咪過得充實呢?相信大家都喺度諗緊點樣為2025年定立新目標,希望可以幫到更多客戶,同時創造更好嘅成績。講起未來發展,今年12月10日「亞洲保險論壇」就請到超過20位來自世界各地嘅知名講者同金融領袖分享咗唔少真知灼見。
其中,特首李家超喺論壇開幕辭度強調,香港喺國際舞台一直扮演全風險管理嘅關鍵角色,持續吸引全球最著名嘅保險公司同投資者。而家有大約160家授權保險企業,當中包括6家屬全球十大保險公司落戶香港,3大國際保險集團都揀咗香港做亞太區管理基地,充分體現香港作為國際金融中心同保險業樞紐嘅獨特優勢。
特首仲特別強調,科技創新將會成為保險業嘅關鍵推手。香港而家致力推動保險業嘅科技同數碼轉型,保監局亦都積極營造有利創新嘅環境,等業界可以透過新嘅數碼商業模式提升客戶體驗。事實上,香港嘅保險科技發展迅速,透過人工智能、大數據分析同區塊鏈技術,已經為企業同消費者帶來更多便利同效益,令保險服務更加個人化同高效率。
至於唔少保險業人士翹首以待嘅粵港澳大灣區市場,特首認為當中機遇處處,潛力無限。佢以「港車北上」嘅汽車保險為例,認為正好展示保險業互聯互通嘅成效。加上而家越嚟越多港人諗住退休後到大灣區生活,佢鼓勵業界要探索更多創新嘅跨境保險產品,滿足兩地居民同企業嘅需求。而特區政府會繼續推動內地同海外企業喺香港設立保險業務,透過創新力量,令香港成為更具吸引力嘅保險同風險管理基地。
講咗咁多,相信已經為唔少保險業從業員打咗支強心針,鼓勵大家繼續善用香港優勢,結合創新構思同科技,開發更多適合市場嘅產品同服務。而值得一提嘅係,今個月中,保監局主席姚建華獲續任,加上有新成員加入保監局,為管理團隊注入新動力。喺監管環境穩定、創科發展、大灣區機遇等正面因素嘅支持下,2025年實在令人期待!你又點睇呢?
保寶達人 – 為您八盡保險天下事
更多保寶達人手記Click Here
任何於本文章的評論或意見純屬來自個別嘉賓/隊長等,並未代表保協之立場。