銀髮經濟新機遇 7大措施逐個睇

大家知唔知香港人口老化有幾嚴重？政府統計處預計去到2043年，每3個港人就有一位係長者。咁同保險業又有咩關係呢？政府「促進銀髮經濟工作組」近期落實推出30項措施，當中7項就同財務及保障有關。既然本港嘅長者人口持續增長，意味住市場對保險同財務策劃嘅需要會越來越大，各位從業員如果能夠把握機會，除咗可以更有準備咁為客戶提供需要嘅資訊同服務，幫佢哋打造理想嘅退休生活，更可以為個人業務帶嚟增長。

到底嗰7項同財務及保障有關嘅措施係乜？

1. 開發更多跨境養老保險產品

唔少保險公司都有推出儲蓄型保險，部分仲可以俾保單持有人享用內地養老設施。你可能會問，點解咁多人有興趣？因為大灣區地大物博，生活成本比較低，如果喺醫療同保障方面都能夠滿足港人嘅需求，相信有唔少人都會考慮跨境養老。就連保監局主席姚建華都話，保監局會同擁有經驗和能力嘅保險公司探討能否引入香港巿民可負擔嘅產品，便利佢哋使用位於大灣區內地城巿嘅優質養老設施。

2.​ 加強推廣「平安三寶」

乜嘢係「平安三寶」？遺囑、持久授權書同預設醫療指示，聽落好似唔關你事，但其實保險同法律密不可分。大家如果能夠搵到一啲策略合作夥伴，能夠為客戶提供轉介，唔使客戶自己四圍搵，自然更加容易贏得客戶嘅歡心。

3.​ 推動年金市場發展

「退休3寶」包括年金、保單逆按揭、安老按揭，全部都可以幫長者提供穩定收入，其中年金更可以為從業員帶嚟龐大商機。

4.​ 加強長者理財教育

相信大家平日都會同客戶分享一啲理財知識同資訊，隨住工作組提出加強相關教育工作，相信有助提高市民對於退休儲備規劃同保障嘅關注，繼而帶動對相關產品同服務嘅需求。當然業界亦都可以繼續做多啲相關嘅教育工作，提升市民關注嘅同時，亦都可以藉此機會建立信任關係。

5.​ 加強長者金融防騙教育

同上一點一樣，透過教育工作同市民建立更加密切嘅關係，當佢哋有需要嘅時候，自然會諗到你，提升自己甚至公司嘅競爭優勢。

6.​ 加強銀行防騙措施

隨住長者成為詐騙集團嘅目標之一，銀行正積極推廣反詐騙教育。而保險業不時亦會出現一啲騙案，保險業可借鏡銀行業界，舉辦相關防詐騙活動，提升客戶對金融安全嘅信心，同時拓展客戶群。

7. 制定《長者友善銀行服務指引》

指引要求銀行簡化服務流程並推出長者專屬理財產品。保險業可借鑒此做法，設計操作簡單嘅保險產品或服務流程，以滿足長者需求，提升市場競爭力。

大家睇到呢度，相信都會認同，工作組落實嘅措施為行業創造咗唔少機會，只要你識得捉住呢個趨勢，提供貼心、專業、創新嘅服務，相信必定能夠令事業更上一層樓。你準備好迎接銀髮經濟嘅大時代未？如果未，依家就開始行動啦！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。