打擊不合規Cold Call你我有責

有資深保險大隊長表示，合規嘅Cold Call對行業發展係有正面幫助。佢分享話，自己入行頭幾年都係靠Cold Call建立客源，前後加埋成功認識咗大約200個客戶，而家仲成為咗好朋友，可見Cold Call確實有正面作用。

不過問題在於，點樣先可以分辨邊啲係合規，邊啲係違規？據了解，而家業界最關注嘅係有無牌人士扮晒保險公司職員，喺聯絡市民之後，將客戶資料轉賣畀持牌從業員，呢啲行為明顯違規。另一位保險大隊長就話，佢哋公司已經明確指出絕不容許呢種行為，一旦發現即刻炒無情講，反映業界對違規Cold Call係零容忍。

其實，睇返Cold Call嘅本質，佢只係一種推廣銷售方式，對市民同業界都有一定好處。好似有啲市民平時少機會接觸保險代理，冇渠道了解保險資訊，Cold Call就提供咗一個機會，等佢哋可以透過專業中介人嘅分析，了解自己嘅保障需要，甚至可以順便做埋財務策劃，為自己同家人建立更完善嘅保障規劃。

對業界嚟講，好多新入行嘅中介人都會面對缺乏客源嘅問題，除咗搵親友介紹之外，Cold Call就係佢哋最有效開拓市場嘅方法。如果冇咗呢個渠道，新人起步必定會更加困難，甚至影響佢哋入行嘅意願。

綜合各方意見，Cold Call嘅價值係毋庸置疑，關鍵在於要合規合法！除咗中介人要嚴守法規，唔可以用非法途徑獲取客戶資料之外，保險公司同團隊都應該向中介人灌輸正確觀念，鼓勵舉報違規行為，一齊維護行業專業性。

講到尾，打擊違規Cold Call唔係要全面禁止電話推銷，而係要建立健康嘅營商環境。只有咁樣先可以平衡到行業發展同消費者權益。達人我就建議保險業界主動出擊，訂立更嚴謹嘅內部監管制度，等大家都可以喺公平有序嘅環境入面發展。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。