融入大灣區新時代 香港保險業界如何裝備自己？

各位保險業嘅從業員，相信大家都有留意到「粵車南下」已經實施，呢個政策意味住中港兩地嘅融合又邁進咗一大步。當人流、車流、資金流嘅互動越嚟越頻繁，對保險業嚟講，既係機遇處處，亦都帶嚟新挑戰。面對呢個勢不可擋嘅大灣區發展趨勢，大家又應該點樣裝備自己呢？

要融入大灣區，第一步當然係「認識國情，連結未來」。聽聞早前「保協」喺深圳前海舉辦活動，主題正正就係呢8個字。點解揀前海？就係睇準當地喺醫療數據互通方面嘅創新。例如前海推出嘅「醫療跨境數據空間」，可以實現港人北上就醫時嘅「無感理賠」同即時結算，大大提升客戶體驗。

呢啲政策上嘅突破，加上「港車北上」、「粵車南下」帶動嘅頻繁往來，正正為跨境醫療保險、汽車保險等產品創造咗龐大嘅發展空間。從業員如果只係熟悉香港嘅情況，唔主動了解內地嘅市場需求同政策走向，隨時可能會錯過機遇。

唔想錯過呢啲機遇？咁從業員嘅角色同技能都要升級。未來嘅保險從業員，相信唔再單單係一個只認識本地嘅從業員，而係一個能夠提供跨境綜合方案嘅專家。呢樣意味住除咗保險知識，大家仲要涉獵更多領域。例如內地嘅稅務法規係點？企業「出海」有咩風險同策略？點樣幫客戶做跨境資產配置？呢啲都係我哋需要學習嘅新課題。有內地學者就提出，未來需要嘅係「複合型人才」，即係「保險+健康」、「保險+法律」、「保險+AI」等等。只有不斷增值，將自己打造成一個跨領域嘅「專家」，先可以喺競爭中脫穎而出。

除咗大灣區融合，另一個席捲全球嘅趨勢亦不容忽視，就係之前講過好多次嘅人工智能（AI）。有業內人士甚至形容，AI係決定保險業「生死存亡」嘅關鍵。聽落好似好誇張，但其實AI並唔係要取代我哋，而係賦能我哋。試諗下，當AI可以幫手處理繁瑣嘅數據分析、核保理賠、甚至初步嘅客戶需求配對，從業員就可以將更多時間同心力放喺建立客戶關係、理解複雜需求、提供人性化關懷呢啲更具價值嘅工作上。擁抱科技，利用AI提升服務效率同專業度，將會係未來保險從業員需要掌握嘅基本功。

所以總括嚟講，大灣區融合同科技發展可以話係推動行業變革嘅兩大引擎。未來香港保險從業員要繼續自我增值，成為一個真正理解國家政策、熟悉兩地市場，善用科技嘅「灣區保險專家」。呢個轉變雖然唔容易，但只要大家願意踏出學習嘅第一步，主動增值，前面嘅道路必定會更寬廣。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。