AI愈強，退休愈心慌？ 1招應對退休風險

以前講退休，大家都係諗住捱到65歲，供完強積金、儲夠一筆錢，就可以享受退休生活。點知呢幾年AI發展愈來愈快，搵資料、做報告、就連睇電郵做分類，差唔多全部都可以自動波……科技明明係幫緊我哋慳時間，點解反而令打工仔對退休越嚟越心慌？

有機構近日發表咗份《2026年香港退休調查》，當中訪問咗過千名30歲或以上、月入至少1.5萬港元嘅在職人士。結果發現高達55%受訪者覺得AI令退休前景比上一代更難預測；而當AI真正影響到工作、收入甚至退休安排時，得21%人認為自己已做足準備！

大家咁驚，原因好簡單——因為遊戲規則已經變咗。以前打工仔大約都仲估到自己幾時可以退休、大概有幾多退休儲備。但今時今日，AI幫公司慳成本之餘，亦令唔少工種面臨隨時被淘汰風險。

當在職生涯變數大咗，大家對安全感嘅門檻自然越推越高。該調查顯示，近6成受訪者認為要手握超過500萬儲蓄同投資先敢安心退休，甚至有22%人覺得要1,000萬先夠安全感。呢啲數字雖然未必人人啱用，但反映出港人內心深處嘅焦慮——樓要供、仔女要養，萬一中途無咗穩定收入，或者退休後要過多20、30年，手頭嘅錢真係頂得住？

當然，面對大環境變化帶來嘅不安，盲目擔心係冇用嘅。趁依家仲有收入、有選擇權嘅時候，大家好應該冷靜落嚟，認真檢視自己嘅財務現況：到底每月儲到幾多錢？萬一失業，現有積蓄可以支撐幾耐？退休年齡仲有冇彈性？講真，未必人人都可以即時儲多幾十萬，但起碼要清楚自己嘅底線喺邊。與其等風險嚟到先臨急抱佛腳，不如早一步幫自己諗定出路。

而打工仔呢份急需搵出路嘅焦慮，正正就係保險從業員嘅機會。客戶今日未必想聽單向嘅產品介紹，佢哋更需要有人幫佢了解自己需要：如果遲幾年先退休，生活品質會差幾遠？如果想提早享受人生，手頭又有幾多本錢？從業員嘅價值正正係聽明客戶喺度驚乜，幫佢哋喺混亂中搵返主導權。

始終，唔係樣樣嘢AI都做得到。醫療、危疾、儲蓄、年金各有用途，世界上冇一套啱晒所有人嘅萬能plan。AI可以幫人計現金流、分析數據，但佢唔會明白，點解一個家長寧願少賺啲錢，都想留多點時間陪小朋友成長。呢啲人情味同埋同理心，先係人與人溝通最核心嘅價值。

所以姑勿論AI係咪真係會令你提早退休，但佢打亂部分人嘅人生路線圖已經係事實。對打工仔嚟講，最值得問嘅相信係：如果聽日一切有變，我仲有幾多選擇？

各位保險從業員，不妨諗諗點樣幫客戶解決呢個問題。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。