業界抗疫3部曲 保險大隊長為您護航

前排限聚令放寬,保寶達人都多咗同保險人飯聚,當然好多行家都嘆生意難做,但都聽到唔少令人振奮嘅消息,有啲主力做本地生意嘅團隊,生意無乜受到影響;有啲就話好彩之前「好天斬埋落雨柴」,同埋公司都有提供支援,暫時都仲支持到落去。

除咗有保險公司同業界精英撐住,一啲代表保險業嘅大型協會亦為業界抗疫出咗唔少力,好似一向關注保險從業員需要嘅「保協」(香港人壽保險從業員協會),一班資深大隊長就好積極為業界發聲,向政府建議加強支援保險代理同經紀,成個抗疫行動可以分為「3部曲」。

 

多管齊下減從業員財政壓力

 

喺2月社區傳播高危期間,個個都好怕中招,所以「第一部曲」就係成立共100萬港元嘅「新型冠狀病毒支援抗疫基金」,俾不幸確診新冠肺炎嘅「保協」會員同保險從業員申請。基金到而家一共收到6宗申請,每宗有1萬蚊津貼。

 

「第二部曲」就係為保險代理爭取實際支援,由於保險中介人大多數係自僱人士,「保協」聯同業界其他機構,一齊向政府反映業界面對緊嘅困境,成功喺第二輪防疫抗疫基金為自僱人士爭取到一啲援助,只要喺今年3月31日擁有強積金戶口,就可以申請一筆過7,500元補貼,就算65歲以上,只要未取消MPF戶口都可以申請。

 

IANG爭取續證特別安排

另一方面,有唔少IANG留喺香港做保險業,由於佢哋每年續領工作簽證都要滿足薪金要求,於是「保協」為佢哋向入境事務處爭取到,只要提供到公司解釋信,今個年度好大機會可免除薪金要求續簽,同埋如果有合理理由,亦可以喺簽證期滿前提早申請延長逗留等靈活安排。

 

至於準備當中嘅「第三部曲」,就係因為睇到疫情對實體經濟嘅打擊最近開始浮現,失業數字唔係好樂觀,保險業5月份生意下滑得都幾嚴重。為咗應對未來或更嚴峻嘅情況,「保協」而家計劃去信政府,建議將現職活躍持牌嘅保險從業員補助金額,提升至每月9,000元,為期半年咁話。的確,自僱人士自己就係僱主,都應該得到一般僱主嘅「保就業」資助,如果真係成事就好喇!

 

保寶達人為您八盡保險天下事

更多保寶達人手記Click Here