示威勁過打風？旅程延誤索償你要知！

最近機場接連出現示威活動，嚟緊又到颱風季節，令旅客遇到航班延誤或取消嘅機會率大增。坊間旅遊保險普遍都涵蓋旅程延誤或取消嘅保障，但如果示威活動或天災導致航班延誤或取消，旅遊保險又保唔保呢？

如果有睇過月初嗰篇「遊行示威時受傷 醫療保險有無得賠？」應該估到，又係「定性」出場嘅時候。要判斷近日示威者癱瘓機場係咪屬於保障範圍，除咗要睇政府對該次事件嘅定性外，亦要視乎個別保險公司點樣詮釋保單條款中「暴亂」等字眼嘅定義。

有保險大隊長就話，今次機場事件導致嘅索償，部分保險公司傾向以「特事特辦」方式處理，唔係下下講條款點點點。計我話，今次酌情處理在公在私都有需要，保險公司今次如果揸正嚟做唔肯賠，對品牌形象點都會有啲影響，加上「行程延誤」賠償金額有限，換個角度睇，當賣廣告都抵返啦！

臨出發先買或「無得賠」

雖然部分保險公司會彈性處理，但有樣嘢唔可以唔知。好多人習慣臨出發前先買旅遊保，甚至入到禁區先用手機上網買，但唔好以為咁樣就穩陣，因為旅遊保通常有「已知風險」條款。如果影響行程嘅消息，唔理係示威、罷工定打風，已經傳出或新聞已有報道後，投保人先投保，因為屬於「已知風險」，照理保險公司大多數會拒絕賠償。不過，因各間保險公司條款不盡相同，如有疑問，可以搵保險公司或你嘅代理查詢。

保寶達人就建議大家落實行程後，最好出發兩、三日前就買定旅遊保險，咁就唔使擔心；又或者索性買定全年旅遊保，皆因如果每年公幹旅遊幾次，其實買全年旅遊保更加着數！

打風索償先係最大鑊

不過今次機場事件，其實對保險公司嚟講唔算太大件事，反而上年山竹襲港嗰次先係真正嘅大鑊。因為山竹帶嚟嘅破壞唔止航班取消咁簡單，係差不多所有類型嘅保險都受影響。據統計，山竹導致嘅各類保險索償申請接近3.2萬宗，索償金額約29億港元，而其中近22億係來自財產損失。而家各區催淚煙放題，嚟緊又到打風季節，係時候檢視一下自己嘅意外或家居保喇，下期再續。

保寶達人 – 為您八盡保險天下事

更多保寶達人手記Click Here