保險agent注意 遙距簽單背後的啟示

呢兩日因為返工時間又要開始逼地鐵,就知唔少企業應該已經「復工」。雖然而家「遙距工作」熱潮開始降溫,但「遙距簽單」買保險(只限部分產品)就開始升溫,甚至有公司推出「遙距簽單」專屬優惠吸新客。

 

講開呢個措施,多數保險公司同團隊都舉腳贊成,不過有資深大隊長就有唔同睇法,特別係如果疫情持續,到咗今個月底保監會唔會「加碼」,開放更多保險產品可以「遙距」買呢?

 

「去中介化」或成事實

有大隊長覺得「水能載舟、亦能覆舟」,如果遙距簽單措施進一步擴大,有可能會加速「去中介化」都唔定。講開「去中介化」,大家知唔知澳洲嘅保險代理差唔多已經絕晒種,市場只有獨立理財顧問(IFA),不過佢哋亦無佣金收,只可以收顧問服務費,但當地講緊嘅係2,500萬人口,比香港仲要多兩倍以上!

 

網購發展超乎想像

澳洲嘅「去中介化」好大程度係因為市場監管,但大家千祈唔好忽視科技呢個重要元素,特別係虛擬保險。好多年前互聯網剛剛普及,邊個會諗到手機上網可以即時買到旅遊保、家居保呢類保險?而家就連醫保同壽險都有得買。總之唔理係乜嘢產品,網購都已成為大趨勢,將來網上買保險只會愈來愈普及,而呢個潮流亦唔能夠逆轉,所以agent能夠做嘅,就係加強自己嘅服務價值,特別係為客戶進行個人理財策劃嘅能力,因為呢一part暫時電腦都未取代到。

 

講真,保監局今次容許嘅「遙距簽單」,出乎意料唔係大家認為嘅網上簽單,而係郵寄掛號信連保單文件俾客戶簽,呢種「郵寄簽單」某程度上都保障咗agent嘅角色,所以各位agent暫時都唔使過分擔心。

 

保寶達人為您八盡保險天下事

更多保寶達人手記Click Here