賤招搶客冇底綫　接到Cold Call提防提防

大家近來有冇接多咗Cold Call促銷電話呢？當然叫人借錢或買保險嘅Call一啲唔出奇，但近排就出現一啲有關保險嘅「變種Cold Call」，以不實資料例如訛稱投保人個Agent已經離職，或者貶低Agent服務水平嚟搶客。呢啲賤招直頭係監粗搶人飯碗，保寶達人實在睇唔過眼，點都要爆呢班害群之馬嘅不當手法！

行內係人都知，「買Cold Call」係Agent其中一個開拓客源嘅方法，但係當Cold Call愈來愈難做嘅時候，買Call嘅客就會減少，咁呢啲Cold Call公司為咗留住客戶，於是就會「開發」出唔同方法「儲Call」，有啲聽起嚟仲幾似「電話騙案」。  

睇準客戶心理弱點埋手

咁最近嘅「搶客Cold Call」係咩玩法呢？通常佢哋打嚟首先會問你「請問係咪XX保險公司嘅客戶呀？」由於某幾間大公司客戶眾多，撞中嘅機會都幾大，跟住佢哋就會嘗試令你認為佢哋係該公司嘅客戶服務部職員，話跟開你啲保單嗰位Agent近3個月都無同你Review過保單，違反咗公司嘅服務指引，而家會安排另一位「服務大使」（為咗減低目標嘅戒心，佢哋多數唔會話係另一個Agent）嚟同你商討保單嘅安排，睇吓幾時方便可以聯絡你之類，隔一陣就會有另一個Agent打俾你跟進，之後嘅事唔使多講。

以上個案其實背後有巧妙嘅心理戰。如果個客同跟開個Agent唔係太熟，當收到呢類電話，會感覺好似自己「篤」咗佢出嚟，咁就通常唔會將件事講返俾個Agent知，而呢班人就係利用呢個人性弱點來暗地裏搶客。不過好在都有好多Agent同客係好好朋友，個客有懷疑一定會同Agent確認，咁呢啲不當手段就唔會得逞啦。  

靠詆毀搶客必自食其果

喺呢度保寶達人好似炮轟Cold Call公司咁，但呢啲公司唔係Agent，佢哋嘅目的只係「儲Call」，等之後賣俾想買Call嘅Agent，當賣咗個Call俾人，簽唔簽得成根本唔關佢哋事。  

保寶達人仲聽聞連受影響保險公司個CAO都收到4至5個呢類Cold Call，引起高層關注，要內部調查咁話。簡單諗吓就知，如果靠詆毀某公司Agent搶客，而買Call嘅另一個Agent又係同一間公司，咁遲早都會穿煲，所以大家千祈唔好試呀！  

講到尾，要對抗呢啲不良手法，最重要係「Agent說不」，唔Buy呢啲Cold Call，無市場咁就自然會消失啦。