投連險（ILAS）收費高是原罪嗎？

最近保寶達人同大隊長們Happy Hour，大家都講起「投資相連壽險」（ILAS），有資深大隊長就話收到風，證監會近排好關注ILAS，可能之後有機會喺監管方面「加辣」，到時可能打擊保險公司推出呢類產品嘅意慾，連帶影響埋Agent嘅佣金收入。

而家最流行嘅投連險簡稱105，代表提供105%嘅人壽保障，但唔知大家仲記唔記得，其實舊版ILAS係只有101%，當年就曾經畀保監處下令作出結構性修改，特別係針對保單費用同退保費用。

證監傳出風聲，相信係有人覺得ILAS收費比較高，其實保險公司都知，所以一般都會提供現金回贈等，長遠計落收費都未必真係好高。另外又有人認為既然都係投資基金，點解要喺保險公司買，唔直接去銀行或基金公司呢？其實保險公司係以保險產品方式去設計ILAS，就係唔想變成一種短期投機嘅高風險投資工具，而且喺提供壽險保障之外，仲可以幫投保人達到資產增值同遺產規劃嘅目的。

適合着重長線回報人士

ILAS講緊係長線投資，通常設有一定年期嘅鎖定期，既然講到明會鎖死資金，所以呢類產品適合風險承受能力較高，有投資經驗同想有長線回報嘅投保人，而且Agent銷售呢種需要額外考牌，同用更多時間同個客做「財務需要分析」（FNA）同風險承擔能力問卷（RPQ）。所以監管機構如果單憑少量負面個案，就一口咬定隻產品有問題，真係唔係好公平。

大家投資曾經交過「學費」都知道，好多時太過頻繁咁買賣，通常都唔會有好結果，反而如果學價值投資法咁，揀優質資產長期持有，長時間反而變成有利。而ILAS「唔靈活」嘅特性，就反而成為優點。坊間大部分理財經理同顧問，都係要鼓勵個客不斷交易，咁先可以賺到平台服務費同佣金，所以唔理投資升定跌，最得益肯定係個投資平台同經理囉！

但係保險Agent就唔同喇，ILAS通常都5至10年起跳，短時間想轉都轉唔到，之後咁多年個Agent仲要Keep住提供售後服務，例如每半年做Review咁，所以一開頭收多少少佣都算合情合理。

保寶達人 – 為您八盡保險天下事

更多保寶達人手記Click Here