保單要9日內畀到個客　究竟合唔合理？

最近大家有無聽聞有Agent畀保監局捉到「無喺9日內將保單送到投保人手上」呢？講緊係一條一直都無乜人留意嘅例──如果人壽保險保單要交付畀保單持有人，保險公司同中介人要喺保單簽發日期起計9個曆日內交付保單。如果9個曆日限期最後一日唔係工作天，限期可以延長一日。

究竟當初呢個9日限期係點嚟，無人知道。但一張新單由保險公司到Agent手上，一般都需要2至3日，之後可能就只係得返6日，呢6日Agent仲要約個客見面，咁唔係成日都得閒㗎嘛，幾經辛苦約到見到面，唔單止要交付張單，簽完返去仲要上載埋公司個系統先算。

所以唔少Agent都反映9日其實未必夠時間，只不過不嬲有少少Buffer位，所以一直都相安無事，點知保監突然認真起來，聽講仲試過「放蛇」捉違規人士，唔少爭一、兩日未畀到單客戶嘅Agent，就咁被扣5分，要知道扣4次，滿20分就要釘牌，都咪話唔大件事！

有大隊長就好勞氣咁話，保監突然間捉得咁緊，對生意好嘅Agent唔係好公平。「無數」嗰班Agent，就覺得根本唔關我事，但係對「有數」嘅Agent就係一種歧視，如果生意好好，根本連送保單都唔得閒，如果一個唔好彩畀人捉到，一次就扣5分，要知道有啲公司規定扣10分就無得去Convention，又或者唔可以遙距Sell保單，嚴重嘅仲有可能無得撈添。唔通太好數都有罪咩？

當然大家可以轉用e-Policy，但好多行家都覺得畀張實體保單個客，都係一個提供服務嘅機會。保險公司將送單呢個責任交畀Agent，如果中間有乜冬瓜豆腐，就由Agent去孭，咁樣公平咩？不過既然而家條例係咁寫就無辦法，所以保險公司同保險中介人都唔可以輕率。保險公司好應該諗吓點樣幫啲Agent慳返更多時間，例如優化出單系統更加快出張單畀Agent，又或者簡化e-Policy系統嘅操作，咁先係幫到手㗎嘛！

有大隊長就提議促請保監局修改交單日數，一係維持返9日，不過改成工作天，一係就改成14天但唔分工作天，大家又點睇呢？

保寶達人 – 為您八盡保險天下事

更多保寶達人手記Click Here